རྒྱལ་ཡོངས་ཚོགས་སྡེའི་ཚོགས་ཁང་དེ་ཡང་ ཁྲོམ་ལྟེ་བ་ལས་ ཀི་ལོ་མི་ཊར་༢ དང་ཕྱེད་དེ་ཅིག་གི་ས་ཁར་ བདེ་ཆེན་ལམ་དང་ ཝང་ཆུའི་བར་ན་ རྒྱལ་ཡོངས་ཚོགས་ཁང་གི་ཉེ་འདབས་ གླང་ཇོ་ཕར་ཁ་ལུ་ཆགས་ཏེ་ཡོདཔ་ཨིན།

ཚོགས་ཁང་དེ་ཡང་ ཧེ་མའི་ཚོགས་སྟོན་ཁང་རྙིངམ་དང་ ལྷན་འཛོམས་ལྟེ་བའི་ རྩྭ་ཐང་དང་ མེ་ཏོག་ལྡུམ་ར་ དེ་ལས་ སྣུམ་འཁོར་ བཞག་ཐང་བཅས་ གོ་ཡངས་དྲགས་ཡོད་པའི་ས་ཁོངས་ནང་ གཞི་བཀོད་གཅིག་སྦེ་ བསྐྱར་བསྐྲུན་བཟོ་རྣམ་ཅན་ཅིག་གི་ཐོག་ལུ་ རྐྱབ་ཡོདཔ་ཨིན། སྒྲིང་ཁྱིམ་གཙོ་བོ་དེ་ནང་ ཚོགས་སྡེའི་ཚོགས་ཁང་དང་ ལྷན་འཛོམས་ཁང་ ཆེ་རིམ་སྒུག་བཞུགས་ཁང་ དཔེ་མཛོད་ ཁྲི་འཛིན་གྱི་ཡིག་ཚང་ ཁྲི་འཛིན་འོག་མའི་ཡིག་ཚང་ འཐུས་མི་ཚུ་གི་ཡིག་ཚང་ དེ་ལས་ ཞིབ་འཚོལ་ཞིབ་རོགས་ འགཅ་དཔོན་ཚུ་གི་ཡིག་ཚང་བཅས་ཡོདཔ་ཨིན།

སྒྲིང་ཁྱིམ་གྱི་བཟོ་བཀོད་དང་ བཟོ་རིག་དེ་ཡང་ འབྲུག་ལུགས་ཀྱི་སྒྱུ་རྩལ་དང་ལག་བཟོ་ མཐུན་མོང་མ་ཡིན་པ་གསལ་སྟོན་ འབད་བའི་གཞི་བཀོད་ཅིག་ཨིན། སྒྲིང་ཁྱིམ་འདི་གི་ནང་ནའི་ཆ་ཤས་ཚུ་ རང་ལུགས་ཆོས་ཕྱོགས་དང་འབྲེལ་བའི་ མངོན་གསལ་ ཅན་གྱི་རིས་མོ་ཚུ་གིས་ མཛེས་པར་བརྒྱན་ཏེ་ཡོད། དེ་མ་ཚད་ མཁོ་ཆས་མཐུན་རྐྱེན་ཚུ་ཡང་ དེང་སང་ འཕྲུལ་རིག་དང་ འབྲུག་ལུགས་གཉིས་འདྲེས་མ་སྦེ་བཙུགས་ཏེ་ཡོད། སྒྲིང་ཁྱིམ་གཙོ་བོ་དེ་གི་ཕྱི་ཁར་ ཡིག་ཚང་སྡེ་ཕྲན་ཆུང་བ་ ལྔ་ཡོད་མི་ཚུ་ཡང་ ཡོངས་ཁྱབ་དྲུང་ཆེན་ཡིག་ཚང་དང་ དྲུང་ཆེན་ཡིག་ཚང་ཞབས་ཏོག་སྡེ་ཚན་ ཁྲིམས་བཟོ་དང་ བྱ་རིམ་སྡེ་ཚན་ ཞིབ་འཚོལ་དང་ ཟིན་འགོད་སྡེ་ཚན་ དེ་ལས་ བརྡ་དོན་དང་བརྒྱུན་འབྲེལ་སྡེ་ཚན་ཚུའི་ཡིག་ཚང་ཁག་ཨིན།