ཚོགས་ཆུང་ཚུ་ཡང་ དབྱེ་ཁག་གསུམ་ལུ་ཁ་དབྱེ་སྟེ་ཡོད།

འབྲེལ་ཡོད་ཚོགས་ཁང་གིས་ འགན་ཁུར་སྤྲོད་གནང་བའི་གནད་དོན་ཚུ་ ཞིབ་འཇུག་འབད་ནིའི་དོན་ལུ་ ཡུན་རིང་ཚོགས་ཆུང་ཚུ་ གཏན་འཇགས་ཀྱི་ཚོགས་ཆུང་ཨིན། གློ་བུར་ཚོགས་ཆུང་ཚུ་ མང་ཆེ་ཤོས་ཅིག་ གནས་སྐབས་ཅིག་གི་དོན་ལུ་ཨིནམ་ད་ རང་སོའི་ ལཱ་འགན་དེ་མཇུག་བསྡུཝ་ཅིག་ཆ་མེད་གཏངམ་ཨིན། ཚོགས་ཆུང་དེ་ཚུ་ གདམ་འཐུ་ཅན་ ཡང་ དམིགས་བསལ་གྱི་ཚོགས་ཆུང་ ཟེར་ཡང་སླབ་ཨིན།

མཉམ་འབྲེལ་ཚོགས་ཆུང་ཚུ་ སྤྱི་ཚོགས་བཅའ་ཁྲིམས་ཀྱི་དགོངས་དོན་ ཡང་ན་ ཚོགས་སྡེ་དང་ ཚོགས་འདུ་གཉིས་ མོས་མཐུན་ བྱུང་བའི་གྲོས་ཆོད་ལུ་གཞི་བཞག་སྟེ་ ཚོགས་ཁང་གཉིས་ཆ་ར་ལས་ འཐུས་མི་ཚུ་ཡོད་པའི་ཐོག་ལས་ གཞི་བཙུགས་འབདཝ་ཨིན། ཚོགས་སྡེ་ལུ་ གཤམ་གསལ་ཚོགས་ཆུང་བདུན་ཡོདཔ་ཨིན།

དེ་ཡང་ ནང་འཁོད་ཚོགས་ཆུང་། ཁྲིམས་བཟོ་ཚོགས་ཆུང་། དཔལ་འབྱོར་ཚོགས་ཆུང་། མི་སྡེ་དང་ ལམ་སྲོལ་ཚོགས་ཆུང་། རང་བཞིན་ཐོན་སྐྱེད་དང་ མཐའ་འཁོར་གནས་སྟངས་ཚོགས་ཆུང་། ལེགས་ལྡན་གཞུང་སྐྱོང་ཚོགས་ཆུང་། ཕྱི་འབྲེལ་ ལས་དོན་ཚོགས་ཆུང་།